Geguritan: Cakra Manggilingan

Dadiya uninga para kanca
Nalika para winasis jaman kawuri
Wis paring pirang pirang piwulang
Tembung Aja dumeh iku ngemu piweling
Kita sedaya ing marcapada mung titah sawentah
Mila ora pareng ngagul agulke
Kabeh rupa kaluwiyan

Dadiya uninga nalika ana perangan dhuwur
Kita bakal begja mulya, mukti, wibawa lan makmur
Nanging nalika ana ing ngisor
Uripe krasa sengsara, kesrimpet mega, kesandhung bebaya

Dadiya uninga para kanca
Sejatine kabeh lelakon manungsa ing  ngalam donya
Lumaku mubeng gilir gumanti kadya rodha panguripan
Kang wis kawentar mubeng kadya cakra manggilingan

Kulon Progo, 23 Mei 2018

Kaanggit dening Barokatussolihah, S.Ag.,M.S.I, salah satunggaling guru wonten ing pawiyatan MTs N 3 Kulonprogo. Geguritan punika sampun kababar wonten ing Antologi Geguritan Weling Sinanggling, Dinas Kebudayaan Daerah Istimewa Yogyakarta.

Geguritan: Sore Iki

Dening Budi Priyono

Sore iki ingsun ngenteni sliramu
Ati iki tansah kapang nyebut asmamu
Anglelela hannggoda rasa ing ati
Kangen lan tresnaku wus tuwuh nyawiji

Sunaring pasuryanmu kang gawe silap
Rinengga endah gondar gandiring netra
Irung mancung idep tumenging tawang
Kasusul esem lathi abangmu kang angujiwat

Ingsun bisa ngerti arum wangine rikmamu
Nadyan katutupan kandeling hijabmu
Dawa ireng menges-menges manglung
Lurus kang saben wektu tansah ginelung

Kulitmu padhang kuning langsat
Aluus teles kaya kali tan bisa asat
Driji mucuk eri endah kasawang
Kapacak ali-ali cilik rupa abang

Ingsun kudu kandha apa maneh kanggo sliramu
Tansah nunggu janji enggal bisa ketemu
Linambaran suaraning ati lan rasa
Kanthi memuja marang kang duwe kuwasa

Dhuuh wong ayu gegantilaning ati
Sore iki wus mlaku sewelas sasi
Wus ra kaetung gunggunging ratri
Ingsun tansah ngreksa sucining janji

Dhuuuh yayi prawan ayu sigaraning sukmaku
Mugya ndang bisa katurutan lara brantaku
Nyandhing sliramu pepujaning jiwa ragaku
Gegandhengan ngupaya manunggaling atimu lan atiku

Geguritan: Tetep ing Janji

Grahamblanchard.com

Dening Budi Priyono

Kadya lakuning para satriya
Tansah memuja marang pradetya
Bebarengan anganthi janji
Sebaya urip sebaya mati

Kidhung asmara ing tengahing wengi
Nambah gregeting rasa angraras lathi
Nadyan mung angen-angen kang dumadi
Nanging wus bisa nambani polahing ati

Lintang-lintang kang dadi seksi
Mekaring ukara rinengga lathi
Manungsa mung bisa nglampahi
Gusti Allah ing paring pepesthi

Angluh sumpyuh rasaning raga
Bareng sliramu tan bisa suwala
Marang kersaning ibu lan bapa
Kaparingake marang satriya liya

Rojah rajeh tatuning manah
Tan bisa selak tan bisa njangkah
Angin sore mau wus bubar ngilang
Nganthi tresnaku kang ambyar sawalang-walang

Kaanggit dening Budi Priyono, S.Pd., salah satunggaling guru wonten ing pawiyatan MAN 3 Bantul, anggota Pergumapi.